ආචාර්‍ය අජන්තා පෙරේරා විසින් සිකුරාදා දිනයේ දිවයිනට පැමිණීමට නියමිත ඉන්දීය අග්‍රාමාත්‍ය නරේන්ද්‍ර මෝදි වෙත ලබාදීම සඳහා ඉල්ලීම් කිහිපයකින් සමන්විත ලිපියක් අද(02) දින ඉන්දියානු මහකොමසාරිස් කාර්‍යාලයවෙත ගෙනැවිත් භාරදෙනු ලැබුවා. එය ඉන්දියානු තානාපති තුමන්වෙත ලබාදුන් බවට මාධ්‍ය හමුවේ ප්‍රකාශ කළ ඇය එම ලිපියේ අන්තර්ගතය පිළිබඳව ද කරුණු ඉදිරිපත් කළා.
එහිදී ප්‍රධාන වශයෙන් වන අලි මරණ පිළිබඳ දේශීය නිලධාරීන් සහ වගකිවයුත්තන් සමඟ සාකච්ඡා කරන ලෙස ඉල්ලීමක් සිදුකර ඇති බවට අදහස් දැක්වූ ඇය ප්‍රකාශ කළේ ඉන්දියාව ලෝකයේ දියුණු රටක් බවට පත්වෙමින් සිටියදීත් එරටේ අලි ගහණය ආරක්ෂා කරමින් පරිසරය සුරකිමින් ක්‍රියාකරන බවත් ලංකාව වසරකට සිය ගණනිල් අලි ඝාතන කිරීමක යෙදී සිටන බවත් ය. එසේ ම පරිසරය පිළිබඳ ඇල්මක් දක්වන පිරිසක් වශයෙන් මේවන විට රිලවුන් වෙනත් දූපතකට රැගෙන යාමට ඉදිරිපත් කර ඇති සැලසුම ද ඉතාමත් නිවට සහ අදූරදර්ශී ක්‍රියාමර්ගයක් ලෙස ඇය ප්‍රකාශ කළේ රිලවුන් වෙනුවට ඇමති ලාල් කාන්ත එම දූපතට ගෙනගොස් දැමිය යුතුබව ද ප්‍රකාශ කරමිනි.
අවසාන වශයෙන් ඇය ජනාධිපති අනුර කුමාර දිසානායක මහතාගෙන් ඉල්ලිමක් සිදුකළේ රටේ වටිනා සම්පත් උගසට තැබීමක් සිදුනොකරන ලෙස සහ අත්සන් කිරීමට යෝජිත යම් ගිවිසුමක් වේ නම් මහජතාවට විනිවිදභාවයකින් යුතුව එම ගිවිසුම් අත්සන් කරන ලෙසයි.
